Fréttir & greinar

42 starfa þar sem 18 störfuðu áður

25.2.2021

Guðrún Ingvarsdóttir, forstjóri Framkvæmdasýslu ríkisins (FSR) fjallaði um verkefnamiðað vinnuumhverfi og fjarvinnu á nýsköpunardegi hins opinbera. Í erindi hennar kom meðal annars fram að starfsfólk FSR hafi gert róttækar breytingar á vinnuumhverfi sínu undanfarið, enda starfsfólki fjölgað úr 18 í 42 á þremur árum.

Verkefnamiðað vinnuumhverfi (VMV), hentar sérstaklega í þekkingarstarfsemi. Sífellt færri störf innan stjórnsýslunnar felast í svokölluðum sífelluverkefnum. Verkefnin eru því fjölbreyttari. VMV gengur í megindráttum út á að skapa aukna möguleika á samvinnu starfsfólks, auka sveigjanleika húsnæðis og nýta nýja tækni til að mæta nýjum vinnubrögðum.

Nýverið gaf FSR út viðmið um vinnuumhverfi ríkisstofnana, þar sem stóraukin áhersla er lögð á VMV. Á sama tíma kynnti fjármála- og efnahagsráðuneytið nýja stefnu sem styður við markmið viðmiðanna. Hægt er að kynna sér viðmiðin og stefnuna hér.

Í máli Guðrúnar kom meðal annars fram að fjöldi og umfang verkefna FSR hafi aukist mikið á undanfönum þremur árum. Samhliða því hefur starfsfólki fjölgað úr 18 í byrjun árs 2018 í 42 á fyrri hluta 2021. FSR er enn í sama húsnæði hefur því þurft að sýna ítrustu útsjónarsemi í gerð vinnuaðstöðu fyrir starfsfólk. Það hefur engu að síður tekist.

Á myndinni hér að neðan má sjá hvernig uppröðun vinnustöðva var árið 2018.


Hér má sjá uppröðun vinnustöðva eftir breytingar á húsnæðinu á síðasta ári:

Þessi ráðstöfun er þó hugsuð til bráðabirgða, enda er pláss á hvert stöðugildi komið langt undir gefin viðmið. Engu að síður fer vel um alla og sérstaka gleði vekur félagsrými (hjarta) stofnunarinnar sem margfaldaðist að stærð við breytingarnar.

Starfsfólk hefur allt fengið fartölvur til umráða og getur með einföldum hætti stungið þeim í samband við skjái og annan jaðarbúnað við hvaða vinnustöð sem er. Þá var Microsoft Teams tekið til notkunar í verkefnastjórnun og samvinnu fyrir rúmu ári, rétt í tæka tíð fyrir farsóttina. Meira en helmingur starfsfólks hefur undanfarna mánuði unnið í fjarvinnu, sem gengið hefur vel.

Lesa má frétt FSR um efnið hér

Höfundur greinar

Íris Huld Christersdóttir Íris Huld Christersdóttir
Deila þessari síðu
Var efnið á síðunni hjálplegt?

Fjármála- og efnahagsráðuneytið og Ríkiskaup

Tölvupóstur

fjr@fjr.is