Komdu á nýsköpunarmótið 3. október!

Ert þú eða þinn vinnustaður með hugmynd að bættri vöru, verklagi eða nýrri leið til samskipta við notendur? Þá er nýsköpunarmótið eitthvað fyrir þig!

Nýsköpunarmótið verður haldið í fyrsta skipti hérlendis þann 3. október næstkomandi þar sem opinberir aðilar setja fram áskoranir og óska eftir fjölbreyttum lausnum frá sprotum og fyrirtækjum. Samkvæmt skipuleggjendum mótsins gefst aðilum tækifæri á nýsköpunarmóti til að skrá inn prófíl sinn og í framhaldinu að bóka nokkurs konar hrað-stefnumót (Match Making) með öðrum aðilum, ýmist opinberum eða fyrirtækjum.

Fyrirtækjum gefst þannig tækifæri á að kynna mögulegar lausnir á áskorunum opinberra aðila með það fyrir augum að kynna sig, fá hugsanlega tækifæri til þróunar og rannsóknarverkefna eða vera með hugmynd að nýjum verkefnum.

Skráning á mótið fer fram HÉR!

Hérlendis eiga opinberir aðilar nú þegar í miklum samskiptum og viðskiptum við einkaaðila en 35 % nýsköpunarverkefni eru unnin í samstarfi við einkaaðila samkvæmt Nýsköpunarvoginni (2018).

Í samanburði við hin Norðurlöndin er hátt hlutfall nýsköpunarverkefna unnin í samvinnu við einkafyrirtæki hérlendis en aðeins í Finnlandi er hlutfallið hærra eins og sjá má á þessum samanburðartölum hér að neðan (COI, 2019).

Nýsköpunarmót atvinnulífs og opinberra aðila verður haldið 3. október 2019 en að því standa Nýsköpunarmiðstöð Íslands, Ríkiskaup og fjármála- og efnahagsráðuneytið. Er það von þeirra sem standa að mótinu að samvinna þessara aðila muni aukast á næstu árum sem leið til að bæta þjónustu og skilvirkni hins opinbera á sama tíma og styrkt er við nýsköpun í landinu. Mótið er haldið á Grand Hótel  frá 13-16 en nauðsynlegt er að skrá sig sem fyrst til að taka þátt.

Við hvetjum því alla til að kynna sér málið og nýta tækifærið til samvinnu um nýsköpun.