Fréttir & greinar

Framkvæmdasýsla ríkisins stuðlar að nýsköpun meðal starfsmanna

2.9.2019

Framkvæmdasýsla ríkisins (FSR) blés til nýsköpunarmóts í júní síðastliðnum fyrir starfsmenn sína sem var innblásið af Nýsköpunardeginum sem haldinn var í vor. Framtakið er frábær leið til þess að virkja starfsmenn til nýsköpunar sem sýnt hefur verið fram á að skilar sér í auknu virði fyrir samfélagið, starfsemina og starfsfólk. Starfsmenn eru einmitt sá þáttur sem ýtir hvað mest undir nýsköpun opinberra stofnana samkvæmt Nýsköpunarvoginni og því til mikils að vinna að virkja starfsfólk og taka hugmyndum þeirra að umbótum vel.

Hlutverk Framkvæmdasýslu ríkisins er að vera leiðandi afl á sviði opinberra framkvæmda með það að markmiði að bæta verklag og auka skilvirkni, hagkvæmni og gæði við framkvæmdir ríkisins. Framsetning hugmynda í mótinu var frjáls, fyrir hópa eða einstaklinga, og eina skilyrðið var að tillagan uppfyllti a.m.k. eitt af skilgreindum skilyrðum í hverjum af þeim þremur meginflokkum sem einkenna opinbera nýsköpun.

 

Alls bárust tillögur frá 11 höfundum (einstaklingum og hópum) með alls 24 hugmyndum. Tillögurnar áttu það sameiginlegt að vera framlag starfsmanna með fjölbreytta nálgun, frjóa hugsun og einlægan vilja til umbóta í ýmsum víddum starfsemi Framkvæmdasýslunnar. Ólíkur bakgrunnar og þekking starfsmanna sameinaðist í nýskapandi verkefnum sem ekki hefðu litið dagsins ljós í einsleitara teymum.

Ákveðið var að veita verðlaun í þremur flokkum; frumlegasta hugmyndin, snjallasta hugmyndin og besta kynningin.

Viðurkenningu fyrir snjöllustu hugmyndina fékk verkefnið „Súludans“ en í umsögn dómnefndar um verkefnið segir meðal annars:

„Hugmyndin snýst um að skapa myndræna framsetningu húsrýmisáætlana. Í einfaldleika sínum er hugmyndin bráðsnjöll, þ.e að taka viðurkennt staðlað verklag og umbylta framsetningu á hugmyndum og lausnum sem verða til í nánu samstarfi FSR og viðskiptavina. Með betur fram settum upplýsingum er stofnunum og notendum mannvirkja gert auðveldara að skilja og átta sig á því hvað óskir og væntingar hafa í för með sér, samtalið milli FSR og viðskiptavina verður markvissara sem leiðir til betri lausna fyrir alla. Jafnframt má gera ráð fyrir því að góð útfærsla á hugmyndinni muni auðvelda til muna innleiðingu hugmynda um verkefnamiðað vinnuumhverfi og um leið gera opinbera vinnustaði meira aðlaðandi fyrir hæfileikaríkt fólk í framtíðinni.“

Guðrún Ingvarsdóttir forstjóri FSR telur ljóst að Nýsköpunarmótið sé komið til að vera og hefur verið ákveðið að þeim þremur tillögum sem hljóta verðlaun verði hrint í frekari útfærslu á næstunni og í kjölfarið innleiddar í starfsemi FSR. Þá er stefnt að því að frumlegasta tillagan verði framlag FSR á Nýsköpunarmóti hins opinbera sem haldið verður í fyrsta sinn nú í haust.

Hefur þín stofnun eða sveitarfélag haldið nýsköpunarmót?

Endilega hafið samband ef þið viljið frekari upplýsingar um hvernig þið getið virkjað starfsfólk til nýsköpunar.

Höfundur greinar

Íris Huld Christersdóttir Íris Huld Christersdóttir
Deila þessari síðu
Var efnið á síðunni hjálplegt?

Fjármála- og efnahagsráðuneytið

Tölvupóstur

postur@fjr.is

Sími

5459002